行街,睇戲,食飯

尋日朝起就食少少野,執吓間房,就幫羊仔清洗同打腊,平時咁辛苦佢,要兩個星期清洗兼打腊黎慰勞吓..身水身汗,搞到成兩點至衝入厠所沖涼,梳洗,換衫,再騎羊去接台灣女生放工.

同人家打的去建生食個下午茶,再搭巴士出九龍.本來諗住係百老滙電影中心換飛睇"世貿中心 ",但上車至見到張咭係話週末同公眾假除外,於是變陣係旺角落車,去朗豪坊既UA睇.去到見無人排隊,以為有位,原來係無晒位至無人排隊,仲要夜晚七點幾個場都係咁糟糕,真不概為週末......

跟住再返回原本既plan A,搭地鐵去百老滙電影中心睇,搏佢夠僻夠冷,少啲人去,唔用贈劵咪用八折vip card囉.一去到見幾多人係門口, 但去到櫃枱又話仲有位,五分鐘後開場,仲話我夠積分可以買一送一,正~~~

睇完戲,我地行返去旺角搵番間"和井"食鐵板燒(我同人家都係第一次食咋),因之前收過傳單話有大大隻聖子皇.老細好好人,話要等兩三個字,問我貴姓同電話冧巴,跟住我地去咗隔離鋪既精品店睇野.唔夠三個字,老細打我手提話有位lu,幾好服務噃~

我地坐普通枱(bar枱全滿),叫咗牛柳(六成熟),聖子皇x2,大蝦,三文魚同劍腩刺身.老細好好人,提我地點錯醬,又同地講老虎蝦頭啲膏都好食,好多客都鐘意,但可惜我地都唔太好蝦頭.

聖子皇真係幾大隻o架,你睇,長過隻食指o架~~~

甜品係鋪頭自家制既雞蛋布丁,好滑,食落有戲院爆谷既味道,人家話可能係落咗焦糖~~

埋單後,去買咗對鞋(只係得九折),再去食八爪魚丸,我地問收銀哥仔可否俾多包糖漿,因人家覺得抺茶無咩味.哥仔一口話無,因一杯只係跟一包糖漿...後黎有個後生仔又企埋黎我地張枱開餐,我地牛咁眼望住佢落唔落糖漿.佢啜咗幾口都無落到,繼續食八爪魚丸,我同人家亙望,人家心知我想謀咗人地包糖漿.點知後生仔啜多兩口後就打開糖漿包自用....


係巴士站度上咗架村巴,好快就送人家返到屋企.自己搭輕鐵返公司攞羊仔,入村無耐,見一班夜遊少年踩住單車霸住晒來回兩條線,我要閃大燈同收油黎等佢地group埋係左線(打住死火燈黎等),避對面線既私家車.見佢地無再散開至打燈抽頭過.好彩無咩意外啫~~